حکومت نے ریٹیلر ایپ متعارف کرا دی، چھوٹے تاجروں کے لیے ٹیکس نظام آسان بنانے پر زور

وفاقی وزیر خزانہ محمد اورنگزیب نے ریٹیلر ایپ متعارف کراتے ہوئے کہا ہے کہ چھوٹے دکانداروں کے لیے ٹیکس نظام کو زیادہ آسان اور اختیاری بنایا گیا ہے۔ ان کے مطابق ٹیکس نظام میں ڈیجیٹل ٹیکنالوجی کے استعمال سے مالی معاملات میں شفافیت اور کارکردگی بہتر ہوگی۔

اسلام آباد میں وزیر مملکت برائے خزانہ بلال اظہر کیانی کے ہمراہ پریس کانفرنس کرتے ہوئے محمد اورنگزیب نے کہا کہ بجٹ اور ٹیکس پالیسی سے متعلق معاملات کو مزید مؤثر بنانے کے لیے مشاورت کے عمل کو مضبوط کیا جارہا ہے۔

وزیر خزانہ کے مطابق بجٹ کی تیاری اور ٹیکس پالیسی مرتب کرتے وقت پارلیمنٹ کے ساتھ ساتھ کاروباری طبقے سمیت متعلقہ فریقین سے رائے لینا ضروری ہے۔ انہوں نے دکانداروں پر زور دیا کہ وہ نئی ٹیکس اسکیم میں شامل ہوں اور دستیاب سہولتوں سے فائدہ اٹھائیں، تاہم جو افراد اس نظام کا حصہ نہیں بنیں گے ان کے خلاف مستقبل میں ضابطے کے مطابق کارروائی کی جاسکتی ہے۔

محمد اورنگزیب نے کہا کہ ملک کے تمام طبقات کو ساتھ لے کر چلنا ضروری ہے اور کسی مخصوص شعبے کو نظرانداز کرکے مؤثر حکمرانی ممکن نہیں۔ ان کے مطابق تقریباً 25 سے 26 کروڑ آبادی والے ملک کے لیے سادہ، قابلِ عمل اور بہتر نظام فراہم کرنا حکومت کی ذمہ داری ہے۔

انہوں نے کہا کہ حکومت کی کوشش ہے کہ ہر قسم کے کاروبار کو ٹیکس نیٹ میں شامل کیا جائے اور معیشت کے مختلف شعبوں کی ٹیکس نظام میں شمولیت یقینی بنائی جائے۔ ان کے مطابق ریٹیلر ایپ اسی مقصد کے لیے ایک ڈیجیٹل اقدام ہے، جس کے ذریعے ٹیکس نظام کو مزید منظم اور وسیع کیا جارہا ہے۔

وزیر خزانہ نے تاجروں کو یقین دہانی کرائی کہ ٹیکس نظام میں شمولیت کے عمل کے دوران انہیں بلاجواز ہراساں نہیں کیا جائے گا۔

اس موقع پر وزیر مملکت بلال اظہر کیانی نے کہا کہ نئی اسکیم تاجروں سے مشاورت کے بعد تیار کی گئی ہے اور اس کا مقصد ٹیکس دائرہ بڑھانے کے ساتھ دکانداروں کے لیے طریقہ کار کو آسان بنانا ہے۔ ان کے مطابق ریٹیلر ایپ کے ذریعے دکاندار فائلر بننے کے عمل کو بھی مکمل کرسکیں گے، جبکہ یہ سہولت ان کاروباری افراد کے لیے بھی دستیاب ہوگی جو ابھی تک ٹیکس نیٹ میں شامل نہیں۔

بلال اظہر کیانی نے بتایا کہ ریٹیلر اسکیم کی ایپ گوگل پلے اسٹور سے حاصل کی جاسکے گی اور ستمبر کے پہلے ہفتے تک اسے مقامی زبانوں میں بھی دستیاب کرنے کا منصوبہ ہے۔

انہوں نے مزید کہا کہ جن دکانوں پر گرین پلیٹ نمایاں طور پر لگی ہوگی، وہاں ایف بی آر کے افسر کے داخلے سے متعلق مخصوص پابندیاں ہوں گی، جس کا مقصد اسکیم میں شامل دکانداروں کو آسانی فراہم کرنا ہے۔

چیئرمین ایف بی آر راشد لنگڑیا نے کہا کہ ریٹیلر اسکیم بنیادی طور پر تاجروں کی سہولت کو مدنظر رکھتے ہوئے متعارف کرائی گئی ہے تاکہ ٹیکس نظام میں شمولیت زیادہ آسان اور قابلِ عمل بنائی جاسکے۔