’پسوڑی‘ نے یوٹیوب پر ایک ارب ویوز کا سنگِ میل عبور کرلیا

پاکستانی موسیقی کے معروف گانے ’’پسوڑی‘‘ نے یوٹیوب پر ایک ارب ویوز مکمل کرکے ملکی موسیقی کی دنیا میں ایک نیا ریکارڈ قائم کردیا ہے۔

علی سیٹھی اور شے گل کی آواز میں پیش کیا گیا یہ گانا ایک ارب مرتبہ دیکھے جانے والی پہلی پاکستانی میوزک ویڈیو بن گیا ہے، جو ملکی موسیقی کے لیے ایک نمایاں کامیابی قرار دی جارہی ہے۔

رہائی کے بعد ’’پسوڑی‘‘ کو پاکستان کے ساتھ ساتھ عالمی سطح پر بھی غیر معمولی پذیرائی ملی۔ گانے کی دھن، انداز اور منفرد پیشکش نے اسے دنیا بھر میں شائقینِ موسیقی کے درمیان مقبول بنا دیا۔

ایک ارب ویوز مکمل ہونے کے بعد علی سیٹھی اور شے گل کی بین الاقوامی شہرت مزید مضبوط ہوئی ہے، جبکہ ’’پسوڑی‘‘ نے پاکستانی عصری موسیقی کے کامیاب اور مقبول ترین گانوں میں اپنی حیثیت مزید مستحکم کرلی ہے۔