بھارتی انفلوئنسر نِدھی تیواری 30 برس کی عمر میں انتقال کرگئیں

بھارتی سوشل میڈیا انفلوئنسر اور ’’مس پریٹی انڈیا 2024‘‘ کا اعزاز حاصل کرنے والی نِدھی تیواری 30 سال کی عمر میں انتقال کرگئیں۔

مدھیہ پردیش کے ضلع سنگرولی سے تعلق رکھنے والی نِدھی تیواری ہفتے کے روز بھوسا موڑ کے علاقے میں واقع اپنے گھر میں بے ہوشی کی حالت میں پائی گئیں۔ اہل خانہ انہیں فوری طور پر اسپتال لے گئے، تاہم ڈاکٹروں نے ان کے انتقال کی تصدیق کردی۔

رپورٹس کے مطابق نِدھی تیواری سوشل میڈیا پر خاصی مقبول تھیں۔ فیس بک پر ان کے تقریباً 9 لاکھ جبکہ انسٹاگرام پر قریب 7 لاکھ فالوورز موجود تھے۔ ان کی متعدد پوسٹس پر ہزاروں صارفین نے ردعمل دیا، جبکہ بعض ویڈیوز کو لاکھوں مرتبہ دیکھا گیا۔

نِدھی ماڈلنگ اور اداکاری کے شعبے میں کیریئر بنانے کے لیے کوشاں تھیں۔ وہ مختلف تقریبات، ماڈلنگ سرگرمیوں اور ڈیجیٹل مواد کے ذریعے شوبز انڈسٹری میں اپنی جگہ بنانے کی کوشش کررہی تھیں اور مستقبل میں فلموں میں کام کرنے کی خواہش رکھتی تھیں۔

پولیس نے نِدھی تیواری کی موت کے حالات اور ممکنہ وجوہات جاننے کے لیے تحقیقات شروع کردی ہیں۔ حکام کے مطابق موت سے قبل کے واقعات اور ان کے حالات بھی تفتیش کا حصہ ہیں۔

اہل خانہ نے مقامی میڈیا کو بتایا کہ ہفتے کی شام نِدھی فون پر کسی شخص سے گفتگو کررہی تھیں۔ تاہم پولیس کا کہنا ہے کہ اس گفتگو یا کسی دوسرے واقعے کو ان کی موت کی وجہ قرار دینا اس مرحلے پر قبل از وقت ہوگا۔

تحقیقاتی ٹیم نِدھی کے فون ریکارڈ، ڈیجیٹل سرگرمیوں اور دیگر دستیاب شواہد کا جائزہ لے رہی ہے تاکہ ان کے انتقال سے قبل پیش آنے والے واقعات کے بارے میں مزید معلومات حاصل کی جاسکیں۔

موروا تھانے کے انچارج ڈاکٹر گیانیندر سنگھ کے مطابق پولیس اہل خانہ، قریبی افراد اور نِدھی سے رابطے میں رہنے والے دیگر لوگوں سے بھی معلومات اکٹھی کررہی ہے۔ پولیس کے مطابق تاحال موت کی حتمی وجہ یا محرکات کے بارے میں کوئی نتیجہ اخذ نہیں کیا گیا۔