انکم ٹیکس گوشواروں کی آخری تاریخ بڑھانے کا مطالبہ، آئی آر آئی ایس پورٹل میں مسائل کی شکایت

پاکستان کیمیکلز اینڈ ڈائز مرچنٹس ایسوسی ایشن (پی سی ڈی ایم اے) نے فیڈرل بورڈ آف ریونیو (ایف بی آر) سے مطالبہ کیا ہے کہ انکم ٹیکس گوشوارے جمع کرانے کی مقررہ آخری تاریخ میں توسیع کی جائے۔ ایسوسی ایشن کا مؤقف ہے کہ ایف بی آر کے آن لائن پورٹل آئی آر آئی ایس میں تکنیکی خرابیوں کے باعث ٹیکس دہندگان کو اپنے گوشوارے جمع کرانے میں دشواری پیش آ رہی ہے۔

پی سی ڈی ایم اے کے چیئرمین سلیم مکاتی نے کہا ہے کہ آن لائن نظام میں مسلسل مسائل اور انکم ٹیکس گوشواروں کے فارم بروقت دستیاب نہ ہونے کی وجہ سے شہریوں، تاجروں اور کاروباری اداروں کے لیے مقررہ وقت میں اپنی ٹیکس دستاویزات مکمل کرنا مشکل ہو گیا ہے۔

انہوں نے زور دیا کہ موجودہ صورتحال میں ٹیکس دہندگان کو اضافی وقت دیا جانا چاہیے تاکہ وہ اپنے گوشواروں میں ضروری معلومات درست انداز میں درج کرکے قانونی تقاضے پورے کر سکیں۔

سلیم مکاتی کے مطابق آخری تاریخ میں مناسب توسیع سے ٹیکس دہندگان کو درپیش دباؤ کم ہوگا اور وہ پورٹل کی تکنیکی خرابیوں کے باعث ممکنہ مشکلات سے بچ سکیں گے۔ ان کا کہنا تھا کہ ٹیکس دہندگان کو ان مسائل کا ذمہ دار نہیں ٹھہرایا جانا چاہیے جو ان کے اختیار سے باہر ہیں۔

پی سی ڈی ایم اے کے چیئرمین نے ایف بی آر سے اپیل کی کہ وہ انتظامی تاخیر اور آن لائن نظام کی خرابیوں کو مدنظر رکھتے ہوئے گوشوارے جمع کرانے کی تاریخ بڑھانے کا باضابطہ اعلان کرے، تاکہ افراد اور کاروباری اداروں کو اپنے ٹیکس معاملات مکمل کرنے کے لیے مناسب مہلت مل سکے۔