ایران کے خلاف ’’مدر آف آل بمز‘‘ استعمال کرنے پر غور، حتمی فیصلہ تاحال نہیں ہوا

امریکی فوج ایران کی جوہری اور توانائی تنصیبات کو نشانہ بنانے کے ممکنہ منصوبوں میں دنیا کے طاقتور ترین غیر جوہری بموں میں شمار ہونے والے جی بی یو 43 کے استعمال پر غور کر رہی ہے۔ اس بم کو ’’مدر آف آل بمز‘‘ کے نام سے بھی جانا جاتا ہے۔

امریکی نشریاتی ادارے سی این این کی رپورٹ کے مطابق ایران کے خلاف ممکنہ فوجی کارروائیوں کے مختلف آپشنز میں جی بی یو 43 کا استعمال بھی شامل ہے۔ تاہم، رپورٹ میں واضح کیا گیا ہے کہ اس حوالے سے ابھی تک کسی حتمی فیصلے کی تصدیق نہیں ہوئی۔

رپورٹ کے مطابق ٹرمپ انتظامیہ ایسے موقع کی تلاش میں ہے جس کے بعد ایران کے خلاف کارروائی کو کامیابی قرار دیا جاسکے۔ اس کے باوجود یہ سوال موجود ہے کہ آیا اتنے طاقتور بم کے استعمال سے امریکا اپنے مطلوبہ مقاصد حاصل کر پائے گا یا نہیں۔

جی بی یو 43 دنیا کے سب سے بڑے غیر جوہری بموں میں شمار ہوتا ہے۔ امریکی فوج اسے ماضی میں صرف ایک مرتبہ افغانستان میں استعمال کر چکی ہے۔

سی این این کی رپورٹ میں اس بم کو ایران کے خلاف ممکنہ کارروائی کے زیرِ غور آپشنز میں شامل کیا گیا ہے، لیکن اس کے استعمال یا کسی مخصوص ہدف پر حملے کے بارے میں حتمی فیصلہ سامنے نہیں آیا۔