انٹرمیڈیٹ حصہ اول کے سالانہ امتحانات 2026 کے نتائج جاری، طلبہ آن لائن دیکھ سکتے ہیں

اعلیٰ ثانوی تعلیمی بورڈ کراچی نے انٹرمیڈیٹ حصہ اول کے سالانہ امتحانات 2026 کے مختلف گروپس کے نتائج جاری کر دیے ہیں۔ ان میں سائنس پری میڈیکل، سائنس جنرل، کامرس ریگولر و پرائیویٹ، آرٹس ریگولر و پرائیویٹ، خصوصی امیدواروں کے آرٹس ریگولر اور ہوم اکنامکس گروپس شامل ہیں۔

بورڈ کے مطابق سائنس گروپس کے تمام اختیاری مضامین کی جانچ جدید ای اسسمنٹ نظام کے تحت کی گئی۔ اس مقصد کے لیے او ایم آر (OMR) اور ای مارکنگ (E-Marking) ٹیکنالوجی استعمال کی گئی ہے۔

مختلف گروپس میں کامیاب امیدواروں کی تعداد

ناظم امتحانات زرینہ راشد کی جانب سے جاری کردہ تفصیلات کے مطابق سائنس پری میڈیکل گروپ میں 25 ہزار 157 امیدواروں نے رجسٹریشن کرائی، جن میں سے 24 ہزار 544 امتحان میں شریک ہوئے۔ ان میں 11 ہزار 966 امیدوار تمام چھ پرچوں میں کامیاب قرار پائے۔

سائنس جنرل گروپ کے لیے 30 ہزار 991 امیدواروں نے رجسٹریشن حاصل کی، جبکہ 30 ہزار 386 نے امتحانات دیے۔ ان میں سے 15 ہزار 36 امیدوار تمام چھ پرچوں میں کامیاب ہوئے۔

کامرس ریگولر گروپ میں 23 ہزار 549 امیدوار رجسٹرڈ ہوئے اور 22 ہزار 693 نے امتحانات میں حصہ لیا۔ ان میں 9 ہزار 332 امیدوار تمام سات پرچوں میں کامیاب رہے۔ کامرس پرائیویٹ گروپ میں 1 ہزار 485 امیدواروں نے رجسٹریشن کرائی، جن میں سے 1 ہزار 413 امتحان میں شریک ہوئے اور 628 امیدواروں نے تمام سات پرچے پاس کیے۔

آرٹس ریگولر گروپ میں 11 ہزار 171 امیدوار رجسٹرڈ ہوئے، جبکہ 10 ہزار 678 نے امتحان دیا۔ ان میں سے 3 ہزار 748 امیدوار تمام چھ پرچوں میں کامیاب ہوئے۔ آرٹس پرائیویٹ گروپ میں 1 ہزار 702 امیدواروں نے رجسٹریشن کرائی، جن میں سے 1 ہزار 623 امتحانات میں شریک ہوئے اور 692 امیدوار تمام چھ پرچوں میں کامیاب قرار پائے۔

خصوصی امیدواروں کے آرٹس ریگولر گروپ میں 99 امیدواروں نے رجسٹریشن کرائی اور 97 امتحان میں شریک ہوئے۔ ان میں 58 امیدواروں نے تمام چھ پرچے پاس کیے۔

ہوم اکنامکس گروپ میں 146 امیدوار رجسٹرڈ ہوئے، جن میں سے 141 نے امتحانات دیے۔ اس گروپ کے 41 امیدوار تمام سات پرچوں میں کامیاب ہوئے۔

امتحانات میں نیا گریڈنگ سسٹم نافذ

بورڈ نے بتایا کہ آئی بی سی سی اور محکمہ جامعات و بورڈز، حکومت سندھ کے فیصلے کے مطابق رواں سال انٹرمیڈیٹ حصہ اول کے سالانہ امتحانات میں نیا گریڈنگ سسٹم متعارف کرایا گیا ہے۔

اس نظام کے تحت کسی بھی پرچے میں 40 فیصد سے کم نمبر لینے والے امیدوار کو ’’اَن گریڈڈ‘‘ (Ungraded) قرار دیا جائے گا اور اسے اس مضمون میں کامیاب نہیں سمجھا جائے گا۔ ایسے امیدواروں کو متعلقہ پرچے کا امتحان دوبارہ دینا ہوگا، بشرطیکہ وہ امتحان میں شرکت کے لیے مقررہ دیگر شرائط پر پورا اترتے ہوں۔

نتائج دیکھنے کا طریقہ

اعلیٰ ثانوی تعلیمی بورڈ کراچی کے مطابق اعلان کردہ تمام گروپس کے نتائج بورڈ کی سرکاری ویب سائٹ پر اپ لوڈ کر دیے گئے ہیں۔ طلبہ اپنے نتائج بورڈ کی آفیشل اینڈرائڈ ایپ کے ذریعے بھی معلوم کر سکتے ہیں۔

اس ایپ کو گوگل پلے اسٹور پر BIEK کے نام سے تلاش کرکے موبائل فون میں انسٹال کیا جا سکتا ہے۔