انسٹاگرام کا نیا فیچر متعارف کرانے کا اعلان، صارفین 90 منٹ تک کی ویڈیوز شیئر کرسکیں گے

سوشل میڈیا پلیٹ فارم انسٹاگرام نے مختصر ویڈیوز کے ساتھ طویل دورانیے کے مواد کو بھی فروغ دینے کے لیے نئے فیچر کا اعلان کیا ہے۔ اس سہولت کے تحت منتخب صارفین اور کریئیٹرز 90 منٹ تک کی افقی ویڈیوز اپ لوڈ کرسکیں گے۔

انسٹاگرام کے سربراہ ایڈم موسیری نے پلیٹ فارم کی نائب صدر برائے مصنوعات ٹیسا لیونز کے ساتھ ایک ویڈیو شیئر کرتے ہوئے اس نئی سہولت کا اعلان کیا۔ یہ ویڈیو تقریباً 6 منٹ طویل تھی۔

نئے فیچر کو ’فیچرز‘ کا نام دیا گیا ہے۔ اس کا مقصد پوڈکاسٹ بنانے والوں، کامیڈی کریئیٹرز اور طویل ویڈیو مواد تیار کرنے والے دیگر تخلیق کاروں کو اپنا کام براہِ راست انسٹاگرام پر پیش کرنے کا موقع دینا ہے۔

ابتدائی مرحلے میں یہ سہولت امریکا کے بعض کریئیٹرز کو فراہم کی گئی ہے۔ ٹیسا لیونز کے مطابق انسٹاگرام کا مقصد تخلیقی مواد کے ذریعے لوگوں کو ایک دوسرے سے جوڑنا ہے، اور تخلیقی اظہار کو صرف تصاویر یا مختصر ویڈیوز تک محدود نہیں رکھا جاسکتا۔

اس فیچر کے تحت مکمل ویڈیوز کے ساتھ ان کے مختصر تشہیری کلپس بھی شیئر کیے جاسکیں گے، جو ریلز کی شکل میں صارفین کو دکھائی دیں گے۔ ناظرین ان کلپس پر کلک کرکے پوری ویڈیو تک رسائی حاصل کرسکیں گے۔ اس طرح پوڈکاسٹرز اور دیگر کریئیٹرز مختصر ریلز کے ذریعے اپنے طویل مواد کو زیادہ لوگوں تک پہنچا سکیں گے۔

انسٹاگرام نے متعدد اقساط پر مشتمل ویڈیوز شیئر کرنے کے لیے ایک الگ فیچر متعارف کرانے کا بھی اعلان کیا ہے۔ یہ سہولت فی الحال امریکا، بھارت اور میکسیکو کے منتخب کریئیٹرز کے لیے دستیاب ہے، جبکہ آئندہ اسے دوسرے ممالک تک پھیلانے کا امکان ہے۔

پلیٹ فارم لائیو اسٹریمز کی رسائی بڑھانے پر بھی کام کررہا ہے۔ مجوزہ تبدیلی کے تحت لائیو نشریات ریلز فیڈ میں بھی دکھائی جاسکیں گی، جس سے ایسے صارفین تک بھی نشریات پہنچنے کا امکان ہوگا جو متعلقہ اکاؤنٹس کو فالو نہیں کرتے۔

مزید برآں، انسٹاگرام نے اپنی ٹی وی سروس کی توسیع کا فیصلہ کیا ہے۔ اس منصوبے کے تحت انسٹاگرام فار ٹی وی کو ایپل ٹی وی پر بھی دستیاب کرانے کا اعلان کیا گیا ہے۔