پنجاب میں پرائیویٹ گاڑیوں کے لیے سالانہ فٹنس سرٹیفکیٹ لازمی

پنجاب حکومت نے نجی گاڑیوں کے مالکان کے لیے سالانہ فٹنس سرٹیفکیٹ لازمی قرار دے دیا ہے، جس کے تحت گاڑیوں کا فٹنس ٹیسٹ ہر سال کرانا ہوگا۔

نئے ضابطے کے مطابق مقررہ مدت کے دوران گاڑی کا فٹنس سرٹیفکیٹ حاصل نہ کرنے کی صورت میں مالک کو پہلے مرحلے میں چالان کا سامنا کرنا پڑسکتا ہے، جبکہ خلاف ورزی جاری رہنے پر گاڑی کو بند کرنے کی کارروائی بھی کی جاسکتی ہے۔

صوبے میں موجود لاکھوں نجی گاڑیوں کی فٹنس جانچنے کے لیے فی الحال 13 فٹنس سینٹرز قائم ہیں۔ سینٹرز کی محدود تعداد کے باعث شہریوں کو ٹیسٹ اور سرٹیفکیٹ کے حصول کے لیے اضافی مشکلات پیش آنے کا امکان ظاہر کیا جارہا ہے۔

حکومت نے گاڑیوں کے فٹنس سرٹیفکیٹ کے لیے سالانہ فیس بھی مقرر کی ہے، جو گاڑی کی نوعیت کے مطابق 500 روپے سے 2 ہزار روپے تک ہوگی۔

نئے فیصلے کے بعد گاڑی مالکان کو سالانہ فٹنس ٹیسٹ اور سرٹیفکیٹ کے اخراجات بھی برداشت کرنا ہوں گے، جس سے ان کے مجموعی اخراجات میں مزید اضافہ ہوسکتا ہے۔