ٹیسلا کی نئی روڈسٹر کی نمائش، ہوا میں چھلانگ اور فضائی گردش کا مظاہرہ

امریکی الیکٹرک گاڑیاں بنانے والی کمپنی ٹیسلا نے اپنی نئی روڈسٹر اسپورٹس کار پیش کردی ہے، جس کے مظاہرے میں گاڑی کو مختصر وقت کے لیے ہوا میں اچھلتے، فضا میں گھومتے اور دوبارہ زمین پر اترتے دکھایا گیا۔

کمپنی کی جانب سے پیش کی گئی اس گاڑی میں کمپریسڈ ایئر تھرسٹرز اور تقریباً 10 نوزلز استعمال کیے گئے ہیں۔ مظاہرے کے دوران روڈسٹر نے ریمپ پر الٹی سمت میں حرکت کی، ہوا میں چھلانگ لگائی اور دورانِ پرواز گردش کرنے کے بعد دوبارہ زمین پر اتر گئی۔ اس ٹیکنالوجی میں اسپیس ایکس کے راکٹ سسٹمز سے متاثرہ تھرسٹرز شامل کیے گئے ہیں۔

ٹیسلا کے دعوے کے مطابق نئی روڈسٹر ایک سیکنڈ سے بھی کم وقت میں صفر سے 60 میل فی گھنٹہ کی رفتار حاصل کرنے کی صلاحیت رکھتی ہے، جبکہ اس کی زیادہ سے زیادہ رفتار 230 میل فی گھنٹہ سے تجاوز کرنے کا امکان ظاہر کیا گیا ہے۔ تاہم، مظاہرے میں دکھائی گئی صلاحیتوں کے باوجود اسے ایسا فضائی وسیلہ قرار نہیں دیا جا سکتا جو طیارے یا ہیلی کاپٹر کی طرح مسلسل پرواز کرسکے۔

کمپنی نے اس ماڈل کو اپنی جدید انجینئرنگ اور ٹیکنالوجی کی صلاحیتوں کے اظہار کے طور پر پیش کیا ہے۔ ایلون مسک کے مطابق روڈسٹر کی پیداوار 2028 میں شروع کرنے کا منصوبہ ہے۔

نئی روڈسٹر کا ابتدائی تصور 2017 میں سامنے آیا تھا اور اس وقت اس کی ڈیلیوری 2020 میں شروع کرنے کا ہدف رکھا گیا تھا۔ تاہم، مختلف وجوہات کے باعث منصوبہ متعدد مرتبہ تاخیر کا شکار ہوا۔