والدہ کے مشورے پر لاٹری ٹکٹ خریدنے والی خاتون نے 5 لاکھ ڈالر جیت لیے

امریکی ریاست ورجینیا میں والدہ کی تجویز پر لاٹری ٹکٹ خریدنے والی خاتون کی قسمت اس وقت بدل گئی جب انہیں ٹکٹ سے 5 لاکھ امریکی ڈالر کا انعام مل گیا۔

جائلز کاؤنٹی سے تعلق رکھنے والی خاتون اپنی والدہ کے ہمراہ ایک دکان پر گئی تھیں۔ اسی دوران ان کی والدہ نے بیٹی کو لاٹری ٹکٹ خریدنے کا مشورہ دیا، جس پر انہوں نے ٹکٹ خرید لیا۔

خاتون نے جب ٹکٹ کھرچا تو اس پر 5 لاکھ ڈالر کی انعامی رقم درج تھی۔ اچانک اتنی بڑی رقم جیتنے پر ماں اور بیٹی دونوں حیران رہ گئیں۔

خاتون نے بتایا کہ ٹکٹ دیکھنے کے بعد انہوں نے اپنی والدہ سے کہا کہ شاید وہ واقعی 5 لاکھ ڈالر جیت چکی ہیں۔

انعامی رقم کے استعمال سے متعلق خاتون کا کہنا تھا کہ وہ سب سے پہلے اپنی والدہ کے لیے ایک نئی گاڑی خریدیں گی، جبکہ اپنے لیے بھی نئی گاڑی لینے کا ارادہ رکھتی ہیں۔

انہوں نے بتایا کہ جیتی ہوئی رقم کا کچھ حصہ گھر کے ایک باتھ روم کی تزئین و آرائش، ڈولی وُڈ کی سیر اور مستقبل کے لیے سرمایہ کاری پر خرچ کیا جائے گا۔

یوں والدہ کی جانب سے دیا گیا ایک معمولی سا مشورہ بیٹی کے لیے غیر متوقع خوش قسمتی کا سبب بن گیا اور اسے 5 لاکھ ڈالر کی خطیر رقم مل گئی۔