معرکۂ حق کی پہلی سالگرہ کے موقع پر پاک افواج، بالخصوص پاک فضائیہ نے قومی دفاع میں حاصل کی گئی تاریخی کامیابیوں کو خراجِ تحسین پیش کیا ہے۔ اس موقع پر جاری پیغام میں کہا گیا کہ اس معرکے نے نہ صرف قوم کے اعتماد کو مزید مضبوط کیا بلکہ ملکی اداروں کے عزم اور پاک فضائیہ کی جدید جنگی صلاحیتوں کو بھی عالمی سطح پر نمایاں کیا۔
پیغام میں بتایا گیا کہ پاک فضائیہ جدید ٹیکنالوجی، اسمارٹ دفاعی نظام اور نئی جنگی حکمت عملیوں کے ذریعے مستقبل کی ایک طاقتور فضائی قوت کے طور پر ابھر رہی ہے۔ ملٹی ڈومین آپریشنز میں مہارت نے اسے جدید فضائی جنگ کے تقاضوں کے مطابق ایک موثر اور فیصلہ کن فورس بنا دیا ہے۔
پاک افواج کے مطابق معرکۂ حق کے دوران کیے گئے آپریشنز پیشہ ورانہ مہارت، حکمت عملی اور جرات کی اعلیٰ مثال تھے، جنہوں نے فضائی جنگ کی تاریخ میں ایک منفرد مقام حاصل کیا۔ ان کامیابیوں نے پاکستانی قوم کے حوصلے، اعتماد اور حب الوطنی کے جذبے کو مزید تقویت دی۔
بیان میں اس عزم کا اعادہ کیا گیا کہ پاکستان ایک پرامن ملک ہے اور اس کی مسلح افواج خطے میں امن، استحکام اور سلامتی کے فروغ کے لیے ذمہ دارانہ حکمت عملی پر کاربند ہیں۔ ساتھ ہی یہ بھی واضح کیا گیا کہ پاک افواج خطے میں بدلتی صورتحال اور دشمن کی جارحانہ تیاریوں پر مسلسل نظر رکھے ہوئے ہیں۔
پیغام میں کہا گیا کہ پاکستانی مسلح افواج مستقبل کے چیلنجز سے نمٹنے کے لیے جدید ٹیکنالوجی، جنگی مہارت اور دفاعی صلاحیتوں میں مسلسل اضافہ کر رہی ہیں، تاکہ ہر قسم کی صورتحال کا بھرپور جواب دیا جا سکے۔
پاک فضائیہ نے اس بات پر زور دیا کہ دشمن کی کسی بھی مہم جوئی یا جارحیت کا جواب پہلے سے زیادہ طاقت، درست حکمت عملی اور مضبوط عزم کے ساتھ دیا جائے گا۔ معرکۂ حق میں دشمن پاکستان کی تیاری، قوت اور فوری ردعمل کا مشاہدہ کر چکا ہے، اور آئندہ بھی کسی قسم کی جارحیت کا سخت جواب دیا جائے گا۔
پیغام کے اختتام پر قوم کی جانب سے پاک فضائیہ کے افسران، جوانوں اور اہلکاروں کو ان کی قربانیوں، انتھک محنت اور پیشہ ورانہ مہارت پر خراجِ تحسین پیش کیا گیا۔ کہا گیا کہ پاکستان کی فضائی حدود کے دفاع میں پاک فضائیہ کا کردار ملکی عسکری تاریخ کا روشن باب بن چکا ہے۔
پاک فضائیہ نے اپنے عزم، مہارت اور قربانی کے جذبے سے دشمن کے عزائم کو ناکام بنایا اور قومی سلامتی کو مزید مضبوط کیا۔ بیان میں اس اعتماد کا اظہار بھی کیا گیا کہ پاک فضائیہ اپنی پیشہ ورانہ برتری اور جدید جنگی صلاحیتوں کی بدولت دنیا کی بہترین فضائی افواج میں شامل رہے گی۔
پاکستان ہمیشہ قائم و دائم رہے۔