میرپور ٹیسٹ میں بنگلہ دیش کی ٹیم پہلی اننگز میں 413 رنز بنا کر آؤٹ ہوگئی۔ دوسرے روز کھیل کا آغاز بنگلہ دیش نے 4 وکٹوں کے نقصان پر 301 رنز سے کیا، تاہم پاکستانی بولرز نے مزید نقصان پہنچاتے ہوئے پوری ٹیم کو 413 رنز پر محدود کر دیا۔
بنگلہ دیش کی جانب سے کپتان نجم الحسن شانتو نے ذمہ دارانہ بیٹنگ کرتے ہوئے 101 رنز اسکور کیے، جبکہ مومن الحق 91 رنز بنا کر سنچری سے محروم رہے۔ مشفیق الرحیم نے بھی عمدہ کھیل پیش کرتے ہوئے 71 رنز کی اننگز کھیلی۔ دیگر کھلاڑیوں میں لٹن داس 33، تسکین احمد 28، تیج الاسلام 17 اور شادمان اسلام 13 رنز بنا سکے۔
پاکستان کی طرف سے محمد عباس نے شاندار بولنگ کا مظاہرہ کرتے ہوئے 5 کھلاڑیوں کو آؤٹ کیا، جبکہ شاہین شاہ آفریدی نے 3 وکٹیں حاصل کیں۔ حسن علی اور نعمان علی کے حصے میں ایک، ایک وکٹ آئی۔