وزیراعظم شہباز شریف کی جانب سے گلگت بلتستان میں حکومت سازی سے متعلق بیان پر پاکستان پیپلز پارٹی کے چیئرمین بلاول بھٹو زرداری نے مثبت ردعمل کا اظہار کیا ہے۔
میڈیا رپورٹس کے مطابق بلاول بھٹو زرداری نے وزیراعظم کے مؤقف کو سراہتے ہوئے کہا کہ گلگت بلتستان میں پیپلز پارٹی کی اکثریت کو تسلیم کرنا جمہوری اقدار اور سیاسی روایات کے احترام کی علامت ہے۔
انہوں نے کہا کہ حکومت سازی کے حوالے سے وزیراعظم کی جانب سے دی گئی حمایت اور تعاون کی پیشکش کو قدر کی نگاہ سے دیکھا جاتا ہے۔ بلاول بھٹو کے مطابق باہمی مشاورت اور اتفاق رائے کے تحت گورنر گلگت بلتستان اور ڈپٹی اسپیکر کے عہدوں سے متعلق معاملات طے کیے جائیں گے۔
پیپلز پارٹی چیئرمین کا کہنا تھا کہ ان کی جماعت گلگت بلتستان کے عوام کی فلاح و بہبود اور ترقی کے لیے اپنی تمام تر صلاحیتیں بروئے کار لائے گی اور عوامی خدمت کے ایجنڈے کو آگے بڑھائے گی۔