بھارتی ٹی وی کی اداکارہ سنچیتا نے مبینہ طور پر خود کشی کر لی

بھارتی ٹیلی ویژن کی 22 سالہ اداکارہ سنچیتا اوگلے اپنے آبائی گاؤں میں واقع گھر سے مردہ حالت میں پائی گئیں، جبکہ ابتدائی اطلاعات کے مطابق ان کی موت کو خودکشی قرار دیا جا رہا ہے۔

پولیس حکام کے مطابق یہ افسوسناک واقعہ گزشتہ شام پیش آیا، جب اداکارہ اپنے کمرے میں موجود تھیں اور دروازہ اندر سے بند تھا۔ ابتدائی تحقیقات میں انکشاف ہوا ہے کہ انہوں نے مبینہ طور پر ساڑھی کی مدد سے پنکھے سے لٹک کر اپنی زندگی کا خاتمہ کیا۔

اہل خانہ نے فوری طور پر انہیں قریبی اسپتال منتقل کیا، تاہم ڈاکٹروں نے پہنچنے پر ان کی موت کی تصدیق کر دی۔ واقعے کی اطلاع ملنے پر پولیس موقع پر پہنچی اور قانونی کارروائی مکمل کرتے ہوئے لاش کو پوسٹ مارٹم کے لیے بھجوا دیا گیا۔

پولیس کا کہنا ہے کہ اداکارہ کے والد کی شکایت پر غیر فطری موت کا مقدمہ درج کر لیا گیا ہے، جبکہ مختلف زاویوں سے تفتیش جاری ہے تاکہ اصل حقائق سامنے آ سکیں۔