وزیراعلیٰ پنجاب مریم نواز شریف نے صوبے میں نکاسی آب کے نظام کو جدید خطوط پر استوار کرنے کے منصوبے کے تحت 15 اضلاع کی واسا اتھارٹیز کو 272 نئی سیوریج مشینیں فراہم کر دیں۔

وزیراعلیٰ پنجاب مریم نواز شریف نے صوبے میں نکاسی آب کے نظام کو جدید خطوط پر استوار کرنے کے منصوبے کے تحت 15 اضلاع کی واسا اتھارٹیز کو 272 نئی سیوریج مشینیں فراہم کر دیں۔

لاہور میں منعقدہ تقریب سے خطاب کرتے ہوئے وزیراعلیٰ نے کہا کہ حکومت شہری سہولیات کی بہتری کے لیے صرف لاہور تک محدود نہیں بلکہ پورے پنجاب میں یکساں ترقی پر توجہ دے رہی ہے۔ ان کے مطابق مرحلہ وار منصوبے کے تحت 41 اضلاع کی واسا سروسز کو مجموعی طور پر 696 جدید مشینیں اور آلات فراہم کیے جا رہے ہیں۔

مریم نواز نے کہا کہ جدید مشینری کی فراہمی سے نکاسی آب کا نظام مزید مؤثر ہوگا اور عوام کو بہتر شہری سہولیات میسر آئیں گی۔ انہوں نے 15 اضلاع کے لیے مختص مشینوں کی علامتی چابیاں متعلقہ واسا حکام کے حوالے بھی کیں۔

تقریب کے دوران وزیراعلیٰ نے واسا ملازمین سے ملاقات کی، ان کے ساتھ یادگاری تصاویر بنوائیں اور انہیں شہریوں کی خدمت جذبے اور ذمہ داری کے ساتھ جاری رکھنے کی تلقین کی۔ انہوں نے کہا کہ حکومت کی کوشش ہے کہ پنجاب کے ہر شہر میں جدید شہری انفراسٹرکچر فراہم کیا جائے۔

اس موقع پر صوبائی وزیر بلال یاسین اور سیکریٹری ہاؤسنگ نورالامین مینگل نے بریفنگ دیتے ہوئے بتایا کہ پہلے مرحلے میں واسا اداروں کو 12 مختلف اقسام کی 272 مشینیں فراہم کی جا چکی ہیں۔ ان میں سیور جیٹنگ مشینیں، سیور سکشن یونٹس، ڈی واٹرنگ پمپ، ڈی سلٹنگ مشینیں، واٹر باؤزر، ڈمپ ٹرک، ٹریکٹر، بیکو، وہیل ایکسکیویٹر، ٹرک بوم کرین، لوڈر رکشے اور دیگر ضروری مشینری شامل ہے۔

حکام کے مطابق واسا نیٹ ورک کی توسیع کے ساتھ صوبے کے 41 اضلاع میں مجموعی طور پر 696 جدید مشینیں اور آلات فراہم کیے جائیں گے تاکہ نکاسی آب کے نظام کو مزید مؤثر اور جدید بنایا جا سکے۔

وزیراعلیٰ نے اس موقع پر کہا کہ پنجاب میں واسا کی خدمات کا دائرہ نمایاں طور پر بڑھایا جا چکا ہے اور حکومت کا ہدف ہے کہ شہریوں کو بہتر سیوریج اور نکاسی آب کی سہولیات بروقت اور مؤثر انداز میں فراہم کی جائیں۔