چین نے کم مدار والے انٹرنیٹ سیٹلائٹس کا نیا گروپ کامیابی سے خلا میں بھیج دیا

چین نے اپنے کم زمینی مدار میں قائم کیے جانے والے انٹرنیٹ نیٹ ورک کی توسیع کے لیے مزید سیٹلائٹس خلا میں روانہ کردیے ہیں۔ چینی میڈیا کے مطابق یہ 24واں سیٹلائٹ گروپ تھا، جسے جنوبی صوبے ہینان کے کمرشل خلائی لانچ مرکز سے روانہ کیا گیا۔

رپورٹ کے مطابق سیٹلائٹس کو لانگ مارچ 12 کیریئر راکٹ کے ذریعے اتوار کے روز مقامی وقت کے مطابق دوپہر 12 بج کر 10 منٹ پر لانچ کیا گیا۔ لانچ کے بعد راکٹ نے تمام سیٹلائٹس کو کامیابی کے ساتھ ان کے مقررہ مدار تک پہنچا دیا۔

چینی حکام کے مطابق مشن میں شامل تمام سیٹلائٹس مقررہ مدار میں داخل ہوگئے، جس کے ساتھ ہی لانچ آپریشن کامیابی سے مکمل ہوگیا۔

یہ مشن چین کی جانب سے کم زمینی مدار (LEO) پر مبنی انٹرنیٹ سیٹلائٹ نظام کو وسعت دینے کی جاری کوششوں کا حصہ ہے۔ چین ان سیٹلائٹس کے ذریعے تیز رفتار انٹرنیٹ اور جدید مواصلاتی سہولیات فراہم کرنے کے منصوبے پر تیزی سے کام کررہا ہے۔

لانگ مارچ 12 راکٹ نے ہینان کے شہر وین چھانگ میں قائم کمرشل اسپیس لانچ سینٹر سے پرواز کی۔ چین نے حالیہ برسوں میں اپنے سرکاری خلائی پروگرام کے ساتھ ساتھ نجی اور کمرشل خلائی شعبے میں بھی نمایاں سرگرمیاں بڑھائی ہیں، جس کے تحت بڑی تعداد میں سیٹلائٹس کو مدار میں پہنچانے کے لیے مختلف مشنز کیے جارہے ہیں۔

چینی حکام کے مطابق تازہ لانچ کی کامیابی سے ملک کے کم مداری انٹرنیٹ نیٹ ورک کی تعمیر اور مستقبل میں اس کی مزید توسیع کی کوششوں کو تقویت ملے گی۔