بھارت نے پاکستان کو 5-3 سے شکست دے کر ہاکی ورلڈکپ سے باہر کردیا

ہاکی ورلڈکپ 2026 کے پول ڈی کے اہم مقابلے میں بھارت نے پاکستان کو 5-3 سے شکست دے کر اگلے مرحلے میں جگہ بنا لی، جبکہ اس نتیجے کے بعد قومی ٹیم کا ٹورنامنٹ میں سفر اختتام پذیر ہوگیا۔

نیدرلینڈز کے شہر ایمسٹیلوین میں کھیلے گئے میچ میں بھارتی ٹیم نے ابتدا ہی سے جارحانہ انداز اپنایا اور پہلے کوارٹر میں دو گول کرکے میچ پر گرفت مضبوط کرلی۔ کپتان ہرمن پریت سنگھ نے پنالٹی کارنر کے ذریعے بھارت کا کھاتہ کھولا، جس کے بعد ابھیشک نے دوسرا گول داغ دیا۔

دوسرے کوارٹر میں بھارت نے برتری مزید بڑھائی اور ہرمن پریت سنگھ نے ایک اور گول کرکے اسکور 3-0 کردیا۔ پاکستان کی جانب سے حنان شاہد نے گول کرکے واپسی کی کوشش کی، تاہم ابھیشک نے دوبارہ گیند جال میں پہنچا کر بھارت کو 4-1 کی برتری دلادی۔ بعد ازاں پاکستان کے سفیان خان نے گول کرکے وقفے تک مقابلے کا فرق 4-2 کردیا۔

تیسرے کوارٹر میں بھارت کو پنالٹی اسٹروک ملا جسے ہارڈک سنگھ نے گول میں تبدیل کرتے ہوئے اپنی ٹیم کا اسکور 5-2 کردیا۔ پاکستان نے آخری کوارٹر میں مزاحمت جاری رکھی اور حنان شاہد نے اپنا دوسرا گول کرکے خسارہ کم کیا، تاہم بھارت نے مزید کوئی گول کیے بغیر 5-3 سے کامیابی حاصل کرلی۔

اس فتح کے ساتھ بھارت نے پول ڈی میں چھ پوائنٹس حاصل کرکے دوسری پوزیشن پر اگلے مرحلے کے لیے کوالیفائی کرلیا، جبکہ انگلینڈ نے گروپ میں پہلی پوزیشن حاصل کی۔ دوسری جانب پاکستان اس شکست کے بعد ورلڈکپ کی دوڑ سے باہر ہوگیا۔

میچ کے اختتام پر دونوں ٹیموں کے کھلاڑیوں نے ایک دوسرے سے ہاتھ ملا کر کھیل کے جذبے اور روایتی اسپورٹس مین اسپرٹ کا مظاہرہ بھی کیا۔