آئی سی سی پلیئر آف دی منتھ ایوارڈ کے فاتحین کا اعلان

انٹرنیشنل کرکٹ کونسل (آئی سی سی) نے اگست 2026 کے پلیئر آف دی منتھ ایوارڈز کے فاتحین کا اعلان کردیا، سری لنکا کے سونال ڈینوشا نے مینز جبکہ آئل آف مین کی کپتان لوسی بارنیٹ نے ویمنز ایوارڈ اپنے نام کرلیا۔

سونال ڈینوشا نے بھارت کے خلاف دو ٹیسٹ میچوں کی سیریز میں شاندار بیٹنگ کا مظاہرہ کرتے ہوئے 420 رنز بنائے، جن میں تین سنچریاں اور ایک نصف سنچری شامل تھی۔ دوسرے ٹیسٹ میں ان کی 103 اور ناقابلِ شکست 133 رنز کی اننگز نے سری لنکا کو میچ ڈرا کرنے میں مدد دی۔ یہ ان کے کیریئر کا پہلا آئی سی سی پلیئر آف دی منتھ ایوارڈ ہے۔

مینز ایوارڈ کی دوڑ میں انگلینڈ کے فاسٹ بولر اولی رابنسن اور بنگلادیش کے حسن محمود بھی شامل تھے۔

دوسری جانب لوسی بارنیٹ نے آئل آف مین کی جانب سے ویمنز پلیئر آف دی منتھ کا اعزاز حاصل کرکے تاریخ رقم کردی۔ وہ اس ایوارڈ کو جیتنے والی اپنے ملک کی پہلی کھلاڑی بن گئی ہیں۔ بارنیٹ نے اگست میں چار ٹی ٹوئنٹی انٹرنیشنل میچز کے دوران 257 رنز بنائے اور چار وکٹیں بھی حاصل کیں۔

ویمنز ایوارڈ کے لیے تھائی لینڈ کی سلی پورن لاؤمی اور ننّاپٹ کونچارونکینائی بھی امیدواروں میں شامل تھیں، تاہم ایوارڈ لوسی بارنیٹ کے نام رہا۔