معروف پاکستانی اداکارہ عائشہ عمر کا اپنی لیک تصاویر کے تنازع پر تبصرہ

پاکستانی شوبز انڈسٹری کی معروف اداکارہ اور ماڈل عائشہ عمر نے کئی سال بعد اپنی نجی تصاویر کے منظرِ عام پر آنے کے واقعے اور اس سے جڑے تنازع پر کھل کر اظہارِ خیال کیا ہے۔

ایک حالیہ انٹرویو میں عائشہ عمر نے بتایا کہ وہ اپنی قریبی دوست اور اداکارہ ماریہ واسطی کے ساتھ تھائی لینڈ میں تعطیلات گزار رہی تھیں جب ان کی چند ذاتی تصاویر سوشل میڈیا پر پھیل گئیں۔ ان کے مطابق ان تصاویر میں وہ مختلف تفریحی مواقع پر نظر آ رہی تھیں، جن میں ایک تصویر سوئمنگ سوٹ جبکہ دیگر موسمِ گرما کے لباس میں لی گئی تھیں۔

اداکارہ کا کہنا تھا کہ تصاویر کے وائرل ہونے کے بعد انہیں شدید عوامی تنقید کا سامنا کرنا پڑا، جس کے اثرات صرف ذاتی زندگی تک محدود نہیں رہے بلکہ ان کے پیشہ ورانہ سفر پر بھی پڑے۔ انہوں نے بتایا کہ اس وقت تفریحی صنعت میں خواتین کے بارے میں مخصوص سماجی تصورات کو اہمیت دی جاتی تھی، جس کے باعث بعض مواقع ان کے ہاتھ سے نکل گئے۔

عائشہ عمر نے اس بات پر زور دیا کہ کسی بھی شخص کی نجی تصاویر یا معلومات کو اس کی اجازت کے بغیر شیئر کرنا پرائیویسی اور رضامندی کے بنیادی اصولوں کی خلاف ورزی ہے۔ انہوں نے کہا کہ وہ اس وقت ایک غیر سرکاری تنظیم کے ساتھ مل کر ڈیجیٹل پرائیویسی اور ذاتی معلومات کے تحفظ کے حوالے سے آگاہی مہم کا حصہ ہیں۔

ان کے مطابق برسوں بعد اس معاملے پر بات کرنے کا مقصد صرف اپنی ذاتی کہانی بیان کرنا نہیں بلکہ عوام میں یہ شعور اجاگر کرنا بھی ہے کہ کسی کی نجی تصاویر یا معلومات کا غیر مجاز استعمال سنگین نتائج کا سبب بن سکتا ہے اور اس کے متاثرہ فرد کی زندگی پر گہرے اثرات مرتب ہو سکتے ہیں۔