تحریر: رانا رحمان بابا، سوشل ورکر، جنرل سیکرٹری انجمن حقوق شہریاں ساہیوال
پاکستان اس وقت جس معاشی بحران سے گزر رہا ہے، اس کی سب سے بڑی چوٹ عام آدمی اور خاص طور پر سفید پوش طبقے پر پڑ رہی ہے۔ بجلی کے بل اتنے بڑھا دیے گئے ہیں کہ ایک متوسط گھر کا مہینے کا خرچ صرف بجلی ہی نگل جاتی ہے۔
روزمرہ استعمال کی اشیاء آٹا، دال، چینی، گھی، دودھ، سبزی—ہر چیز کی قیمت عام آدمی کی قوت خرید سے باہر ہو چکی ہے۔ تنخواہ وہی پرانی، مہنگائی ہر ہفتے نئی۔ نتیجہ یہ ہے کہ سفید پوش لوگ، جو کبھی کسی کے سامنے ہاتھ نہیں پھیلاتے تھے، آج گھر کا سامان، برتن، یہاں تک کہ خواتین کے زیورات بیچنے پر مجبور ہو گئے ہیں۔
اس پر ستم یہ کہ پیٹرولیم مصنوعات کی قیمتوں میں بھی مسلسل اضافہ کیا جا رہا ہے۔ پوری دنیا میں خام تیل اور پیٹرول سستا ہو رہا ہے، لیکن پاکستان میں الٹی گنگا بہہ رہی ہے۔ ہر بار نئی قیمت کا بوجھ ٹرانسپورٹ، سبزی، کرایوں اور ہر شے پر پڑتا ہے اور اس کا خمیازہ غریب ہی بھگتتا ہے۔ جب ایندھن مہنگا ہوگا تو زندگی کی ہر چیز مہنگی ہو جائے گی۔
عیدالاضحی سر پر ہے، وہ عید جس میں قربانی سنتِ ابراہیمی ہے، لیکن آج کئی گھروں میں چولہا جلانا بھی مشکل ہو گیا ہے۔ جن لوگوں نے سارا سال بچا بچا کر قربانی کا ارادہ کیا تھا، وہ اب دو وقت کی روٹی کا بندوبست کرنے میں لگے ہیں۔ بازاروں میں رش نہیں، لوگ صرف قیمت پوچھ کر آگے نکل جاتے ہیں۔ یہ منظر دیکھ کر دل خون کے آنسو روتا ہے۔
ہم حکمرانوں سے پوچھتے ہیں کہ کیا غریب کا جینا صرف کاغذی اعلانات اور میڈیا کی تقریروں کے لیے رہ گیا ہے؟ اگر بجلی کے یونٹ کا ریٹ کم نہ ہوا، اگر پیٹرول اور ٹیکسوں کا بوجھ اسی طرح عام آدمی پر ڈالا گیا، تو یہ ملک صرف امیروں کے لیے رہ جائے گا۔ سفید پوش طبقہ جو اس سماج کا ستون ہے، وہ ٹوٹ گیا تو پورا نظام بیٹھ جائے گا۔
انجمن حقوق شہریاں ساہیوال حکومت اور متعلقہ اداروں سے مطالبہ کرتی ہے:
1. بجلی کے بلوں میں فوری کمی کی جائے اور ٹیکسوں کا ظالمانہ بوجھ ختم کیا جائے۔
2. پیٹرولیم مصنوعات کی قیمتوں کو عالمی مارکیٹ کے مطابق کم کیا جائے تاکہ مہنگائی کا سلسلہ رکے۔
3. عیدالاضحی سے پہلے ضروری اشیاء کی قیمتوں کو کنٹرول کیا جائے اور سفید پوش اور مزدور طبقے کے لیے ریلیف پیکج کا اعلان ہو۔
ہم صدا بلند کرتے ہیں کہ عوام کی چیخیں اب مزید دبائی نہیں جا سکتیں۔ اگر آج ہم نے آواز نہ اٹھائی تو کل ہر گھر میں اندھیرا ہوگا۔
اللہ ہمارے وطن اور اس کی عوام پر رحم فرمائے۔ آمین۔