امریکی صدر ڈونلڈ ٹرمپ نے اعلان کیا ہے کہ آبنائے ہرمز میں جاری رکاوٹوں کے خاتمے کے لیے اقدامات کیے جا رہے ہیں اور وہاں موجود تجارتی جہازوں اور عملے کے لیے معمول کی سرگرمیاں بحال ہونے کی توقع ہے۔
صدر ٹرمپ نے اپنے سوشل میڈیا پلیٹ فارم پر جاری بیان میں ایران کے ساتھ جاری مذاکرات کا حوالہ دیتے ہوئے کہا کہ بعض اہم امور پر پیش رفت ہوئی ہے، تاہم مالی معاملات سے متعلق کوئی حتمی پیش رفت تاحکمِ ثانی نہیں ہوگی۔ انہوں نے بتایا کہ وہ مزید مشاورت کے لیے سچوئیشن روم جا رہے ہیں جہاں آئندہ کے لائحہ عمل پر فیصلہ کیا جائے گا۔
اپنے بیان میں انہوں نے اس بات پر زور دیا کہ ایران کو جوہری ہتھیاروں کی تیاری سے مکمل اجتناب کرنا ہوگا۔ ان کا کہنا تھا کہ آبنائے ہرمز میں بحری آمدورفت بغیر کسی رکاوٹ کے جاری رہنی چاہیے اور وہاں کسی قسم کی فیس یا ٹول نافذ نہیں ہونا چاہیے۔
ٹرمپ نے مزید دعویٰ کیا کہ آبنائے ہرمز میں موجود بیشتر بحری بارودی سرنگیں امریکی کارروائیوں کے دوران ناکارہ بنائی جا چکی ہیں، جبکہ باقی ماندہ رکاوٹوں کو ہٹانے کے لیے بھی اقدامات متوقع ہیں۔
انہوں نے یہ بھی کہا کہ امریکہ، بین الاقوامی اداروں اور متعلقہ فریقوں کے تعاون سے زیرِ زمین محفوظ افزودہ یورینیم کے ذخائر کو تلف کرنے کے لیے مشترکہ کوششیں کی جائیں گی تاکہ خطے میں سلامتی اور استحکام کو یقینی بنایا جا سکے۔