سابق انگلش آل راؤنڈر کین ٹیلر 91 برس کی عمر میں انتقال کرگئے

انگلینڈ اور یارکشائر کے سابق آل راؤنڈر کین ٹیلر 91 سال کی عمر میں انتقال کرگئے۔

ہڈرزفیلڈ میں پیدا ہونے والے کین ٹیلر نے محض 17 برس کی عمر میں یارکشائر کی نمائندگی کرتے ہوئے فرسٹ کلاس کرکٹ میں قدم رکھا۔ اپنے طویل کیریئر کے دوران انہوں نے 303 فرسٹ کلاس میچز کھیلے اور کئی برس تک یارکشائر کی ٹیم کا اہم حصہ رہے۔

1959 سے 1968 کے درمیان کین ٹیلر نے یارکشائر کی جانب سے سات کاؤنٹی چیمپئن شپ ٹائٹلز جیتنے میں اپنا کردار ادا کیا۔ یارکشائر نے انہیں اپنے دور کے بہترین آل راؤنڈ کھلاڑیوں میں شمار کیا۔

بیٹنگ کے میدان میں کین ٹیلر نے فرسٹ کلاس کرکٹ میں مجموعی طور پر 12 ہزار 864 رنز اسکور کیے، جن میں 16 سنچریاں بھی شامل تھیں۔ ان کی سب سے بڑی انفرادی اننگز 1961 میں وارکشائر کے خلاف ایجبسٹن میں کھیلی گئی ناقابلِ شکست 203 رنز کی اننگز تھی۔

کین ٹیلر نے بیٹنگ کے ساتھ ساتھ درمیانی رفتار کی باؤلنگ میں بھی نمایاں کارکردگی دکھائی۔ انہوں نے اپنے فرسٹ کلاس کیریئر میں 129 وکٹیں حاصل کرنے کے علاوہ 146 کیچز بھی مکمل کیے۔

کرکٹ کے علاوہ کین ٹیلر فٹبال سے بھی وابستہ رہے۔ انہوں نے ہڈرزفیلڈ ٹاؤن کی نمائندگی کرتے ہوئے دفاعی پوزیشن پر بھی کھیل پیش کیا۔