ہنر مند نوجوان اپنے خاندان کی کفالت کے ساتھ ساتھ ملک ؤ قوم کی ترقی کا قیمتی سرمایہ ھیں ۔ مریم نواز شریف

لاھور(پاک لینز).وزیراعلیٰ پنجاب مریم نواز نے کہا ہے کہ نوجوان ملک کا مستقبل اور سب سے قیمتی اثاثہ ہیں، اسی لیے حکومت انہیں دوسروں پر انحصار کرنے کے بجائے خود مختار اور بااختیار بنانے کے لیے مختلف اقدامات کر رہی ہے۔

پرواز کارڈ پروگرام کے تحت تربیت حاصل کرنے والے نوجوانوں سے ملاقات کے دوران انہوں نے شرکاء کو مبارکباد دیتے ہوئے کہا کہ نوجوانوں کی محنت، لگن اور اپنے خاندان کی ذمہ داریوں کو نبھانے کا جذبہ قابلِ تعریف ہے۔ ان کا کہنا تھا کہ کم عمری میں والدین اور گھر کے دیگر افراد کی کفالت کی ذمہ داری سنبھالنا ایک بڑا چیلنج ہوتا ہے، جسے یہ نوجوان احسن انداز میں نبھا رہے ہیں۔

تقریب سے خطاب کرتے ہوئے وزیراعلیٰ نے کہا کہ نوجوان اپنی صلاحیتوں اور ہنر کے ذریعے نہ صرف اپنی زندگی بہتر بنا سکتے ہیں بلکہ ملک کی ترقی میں بھی اہم کردار ادا کر سکتے ہیں۔ ان کے مطابق بیرونِ ملک ملازمت کے مواقع نوجوانوں کو بہتر آمدن، عالمی معیار کی مہارتوں اور قیمتی تجربات سے روشناس کراتے ہیں۔

مریم نواز نے کہا کہ ترقی یافتہ ممالک میں کام کرنے سے نوجوان جدید ٹیکنالوجی، مؤثر نظام اور کامیاب معاشی ماڈلز کو قریب سے دیکھنے کا موقع حاصل کرتے ہیں، جس سے ان کی پیشہ ورانہ صلاحیتوں میں مزید اضافہ ہوتا ہے۔

انہوں نے اس بات پر افسوس کا اظہار کیا کہ بیرونِ ملک جانے والے پاکستانی کارکنوں کی ایک بڑی تعداد غیر ہنر مند افراد پر مشتمل ہوتی ہے، جس کی وجہ سے انہیں بہتر تنخواہوں اور ترقی کے مواقع حاصل کرنے میں دشواری کا سامنا کرنا پڑتا ہے۔ اسی ضرورت کو مدنظر رکھتے ہوئے حکومت پنجاب لاکھوں نوجوانوں کو مختلف شعبوں میں فنی تربیت فراہم کرنے کے منصوبوں پر کام کر رہی ہے۔

وزیراعلیٰ کا کہنا تھا کہ ہر نوجوان کے لیے اعلیٰ تعلیمی ڈگری حاصل کرنا ممکن نہیں، تاہم فنی تعلیم اور سکل ڈویلپمنٹ کے ذریعے بھی کامیاب مستقبل کی بنیاد رکھی جا سکتی ہے۔ اسی مقصد کے تحت نوجوانوں کو ان کی دلچسپی اور صلاحیت کے مطابق تربیت دی جا رہی ہے تاکہ وہ ملکی اور بین الاقوامی سطح پر روزگار کے بہتر مواقع حاصل کر سکیں۔

انہوں نے مزید کہا کہ عالمی مارکیٹ میں ہنر مند افراد کی طلب مسلسل بڑھ رہی ہے اور ایسے کارکنوں کو بہتر معاوضے کے ساتھ زیادہ عزت و احترام بھی حاصل ہوتا ہے۔ اس موقع پر انہوں نے منصوبے کی کامیابی میں کردار ادا کرنے والی ٹیم کی کاوشوں کو بھی سراہا اور نوجوانوں کی فنی تربیت کو حکومت کی اہم ترجیحات میں شامل قرار دیا۔

مریم نواز کے مطابق حکومت پنجاب کنسٹرکشن، ہاسپیٹیلٹی، ٹرانسپورٹ، لوجسٹکس، انجینئرنگ، توانائی اور صحت کے شعبوں سمیت مختلف شعبوں میں جدید تربیتی پروگرام متعارف کرا رہی ہے تاکہ نوجوانوں کو روزگار کے وسیع مواقع میسر آ سکیں۔

انہوں نے بتایا کہ نرسنگ، کُکنگ، ہائیڈروکاربنز اور قابلِ تجدید توانائی جیسے ابھرتے ہوئے شعبوں میں بھی خصوصی کورسز شروع کیے گئے ہیں، جبکہ جدید تقاضوں کے مطابق ٹیکنیکل اور ووکیشنل تعلیم کو مزید مؤثر بنایا جا رہا ہے تاکہ نوجوان عالمی منڈی میں کامیابی کے ساتھ مقابلہ کر سکیں۔