جنوبی کوریا کے سابق صدر کی بیوی کو بدعنوانی کے جرم میں 7 سال کی سزا

جنوبی کوریا کے سابق صدر کی اہلیہ کم کیون ہی کو بدعنوانی سے متعلق مقدمے میں عدالت نے سات سال قید کی سزا سنا دی ہے۔ ان پر سرکاری عہدوں کے بدلے قیمتی تحائف اور مہنگی اشیاء وصول کرنے سمیت مختلف الزامات عائد کیے گئے تھے۔

سیول سینٹرل ڈسٹرکٹ کورٹ میں ہونے والی سماعت کے دوران عدالت نے قرار دیا کہ کم کیون ہی نے ایسے لگژری تحائف قبول کیے جو عام شہریوں کی پہنچ سے باہر سمجھے جاتے ہیں۔ عدالتی کارروائی کو براہِ راست نشر بھی کیا گیا۔

سابق صدارتی جوڑے کے خلاف بدعنوانی کے الزامات کی تحقیقات کرنے والے خصوصی وکیل من جونگ کی کی ٹیم نے عدالت سے کم کیون ہی کے لیے ساڑھے سات سال قید کی سزا کی سفارش کی تھی۔

استغاثہ کا مؤقف تھا کہ کم کیون ہی نے مبینہ طور پر مہنگے زیورات اور دیگر قیمتی تحائف کے بدلے سرکاری عہدوں کے تقرر میں اثر و رسوخ استعمال کیا، جس کے باعث ان کے خلاف قانونی کارروائی عمل میں لائی گئی۔

یہ فیصلہ جنوبی کوریا کی سیاسی فضا میں ایک اہم پیش رفت قرار دیا جا رہا ہے اور اس پر مختلف سیاسی حلقوں کی جانب سے ردعمل بھی سامنے آ رہا ہے۔